Aku badadas ngantung ehek
Ngapit tamaku hang kapit kelek
Ngantung winni erang belek
Hampe salawar ane lelek
Rami ulun basurah hampe kakihi
Laing ka’i tatap raringi
Nyurah kawan kutuan lasi
Kakihi hampe wuntung ka’i puhi
Kami babaris maehek muau yena
Na pimpin daya pamakas gana
Ngatur barisan kawan ulun rama
Jari rapi jalah tantara
Luput Muau kami jam telu
Puang inam uyuh tahalu
Kuman luen manu mariyang wulu
Udi wising puang mahanang Ulu
Itah yena aku hamen bakesah
Iwara kawan ina panyusah
Tenga mais jalah garinting tapah
Hanang ateiku intunu kakah
Rawen paring rawen wulu
Karuwang sungkat amau ulu
Wulan epat yari aku umma pemilu
Hasilni ngulah hanang ulu
Aku mancaleg hang partai mariang
Jari dewan aheng amun sa manang
Mewakili tumpuk siung telang
Ngaheng jari dewan hang Tamiang
Galis duit baratus juta
Hampe ka’i galis amput panguta
Umma kampanye umma ipata
Ma’eh paner Nyalah tata
Teka sarapat hampe murutuwu
Tariye pada hang Tumpa Dayu
Nyalah ulun raja manuwu
Ngunu pemilu ngami tantulu
Erang wulan aku kampanye
Ringi ri’ai jalah namur wunge
Aku, hanyu, takam, here, hanye
Nimpun dukungan hang wuang wange
Wurung karuwang hang lawi kanilan
Tumpuk sagar sejahtera berkeadilan
Maju hang pendidikan andri kesehatan
Janji Kampanyeku ka’iru lengan
Kude upiku yena kajut tamam
Dami talau kayena nanam
Ulun uras midi’ hi Busu Ganam
Sa mareh duitni nyalah hungei Ranam
Hasil pemilu hang wulan epat
Sa midi aku ulun ni epat
Kawan lain galis nempat
Midi here teka Sarapat
Hang Mabidek pada midi aku butit
Ekat bumuhan here kakah barutit
Dada mahanang jari hipit
Kakupe kawan wurung munsit
Pa’uweng guna aku manyasal
Nelang ngantung wasi babasal
Haut talau ke sa’akal
Mulek lagi aku ngari kantal
Dime taun lagi aku sika umma
Ngakali lengan sa rama rama
Mewakili Dapil Barito Utara
Jari dewan hang Palangka Raya
Rueh taun haut tarueh idarangan
Ngapandru dite wuang tukungan
Udi Mantat Nangalis awangan
Tarueh babur puang kataru amangan
Ridu Rareh tiap andrau
Hampe gaha puang ipanerau
Jalah nimpun wua pararau
Wansit babur wurung kakurau
Tawuk tarueh hiye idarangan
Umur anam balas wau hang tangan
Daya paradu bumuhan kawan
Na paruput puang kaiyuh nawan
Rueh taun naragu winni
Magun tarueh puang pangasini
Teka wiwi wawai raringi
Hanyu pada gaha ngawiwi
Mayu tarueh babur eleh
Ada hampe pamangkung pameweh
Tau die nasib iwaleh
Sangsara tarus welum tarueh
Ayo kumpul naun kawan usbah
Wangun yena puang iyuh ubah
Jalah lasi mahaket puang iyuh tawah
Lewu rean kami puang tau lawah
Usbah penduduk, usbah palampung takam
Ati manu weah pasarakan
Nyamitu paner takam basampukan
Nyansarak kami wuah katekan
Andrau yena aku jari walu
Mulek raerai jalah dahulu
Ma’aru ma’ati ngenei alu
minau mamai kakau pampulu
Ngantara wawei sa amau wulu
na enei nadap kawan pangulu
Idarangan hampe ba’anak pulu
welum sanang katumpung wulu’
Haut walu wulan tarueh pangasini
Arai atei mihewu tarueh kakihi
Baruehan hang pulau kopi
Nelang ngumpang panggang kadiki
Haut anam walas jumahat
Aku nahan kasungu bangamat
Puang Malu bagawi weat
Nyimuh duit jalah rawen lu’at
Amun sukup duitku yiti
Wansit tarueh na adu nanjari
Baju pangantin jalah wunge upi’
Arai hewu tarueh raringi
Huan sawat jari upiku yena
Hewuknu wawai nanan tenga
Amirue nu tulak ngulah wawanga
Wuah panyakit puang rasa gana
Tane mariyang hang amau si’at
Riu mateku haut galis metak
Nyamehu tane jari putak
Hanang ateiku jalah na karakat
Inun kasanggup aku murunsia
Nawan rencana teka Kuasa
Taqdir welum puang iyuh ampihala
Biar luyah layu nanamni tenga
Ekat aku kaiyuh bado’a ma hanyu
Ma Allahtala laku kalelu
Geru welum jari arai hewu
Hang surga penu tantulu’
Peta riu mateku, kadinung hanyu tulak lawit
Hang ateiku mahanang jalah wuah gapit
Karengei rawek kawan lengan wurung munsit
Nahan hanang atei, ekat wiwi iyuh kikit
O tumpuk haut enem taun aku nanan Hanyu
Hang ateiku weat nanamni kasungu
Katantau kawan rawen paring wulu
Nelang nyamurung kawan anak duyu
Emah aku kadinung tumpuk natat
Haut galis wuah karakat
Kutuan lanan ekat le,e wakat
Na tanrusak tumpuk puang itah pakat
Rami kawan ulun mitah
Jalahni daya wuah parentah
Bos Batu Bara Puang Gelisah
Kadinung tumpuk Jalah wuah kakasah
Hungei jaranis jari karuh kakat
Kawan Kayu Galis taburukat
Kabun Gatah puang iyuh pantat
Magun lawang ina isi buntat
Itati tumpuk natatku haut rusak
Lalanni jari penu putak
Amun na kiya kira na hantak
Jalah wuah taretek kapak
Hungei unengku mandrus sadi
Karuh lutek jalah riu wadi
Tumpuk kai ang iyuh udi
Lawit teka Simpang Didi
Aku ekat metak riu mate
Hanang ateiku magin Hante
Kadinung panyusah magin tete
Riet mate jalah mute
Aku Mulek ma Tumpuk ulun
Ekat sawat ngenei rawen adriwungun
Daya puang uweng lagi sa endrau wungun
Tumpuk Natat kaliti wangun
Tumpuk sa segah sadi ekat le’e kisah
Kude itati puang ule itah
Penu habu jalah wuah Pukah
Madintang jalah puling butah
Ina aku mindri witu nadap Hungei Mareh
Nelang riumateku pada metak eleh
Lawah tarueh bapisah puang ule jaweh
Gaha pada tarueh ridu rareh
Hanang Ateiku katantau pulau Nanakan
Wua Rereh Maantei jalah pupuan
Tarueh pada panalu huan
Hanyu Lawit muneng hang Ulu Kahayan
Malaing Malahau Nanamni Mate andrau
Jalah rahatan ngupuh kawan anak andrau
Arai ateiku ku daya hanyu nerau
Numpan ngapung hanyu hang higa Jarau
Aku Nempat nunung ngenei atei kasungu
Ngenei Sinta andri Lelu teka waluh Watu
Uma jukung sa weheini tepu
Hamen Panalu puang ule hudu
Hampe tumpuknu ku kai puang kaule mamai
Manalu hanyu hang putut Ramai
Tu’u marauh enguh tenganu jalah wunge sarai
Hampe hewukku kai pada wawai
Panriet batatai tarueh Maharung
antuh ulun sampuk paurung
nelang nyanrengei kawan lengan wurung
Dayanu aku wawai hang wuang urung
Awat Naun Pamakal Pangulu
Wansit na adu kami Badahulu
biar ekat nuen uwut sakulu
sika pangantin upuni raja manuwu
Ina aku mindri witu nadap Hungei Mareh/Di sini aku berdiri kaku mengahadap sungai yang mengalir
Nelang riumateku pada metak eleh/ Di iringi air mataku terus menetes
Lawah tarueh bapisah puang ule jaweh/ lamanya kita berpisah rasanya tak terkira
Gaha pada tarueh ridu rareh/ walaupun sering kita bertengkar
Hanang Ateiku katantau pulau Nanakan/ perih hatiku memandang pohon cempedak
Wua Rereh Maantei jalah pupuan/ buahnya masoih muda menggelantung indah
Tarueh pada panalu huan/ kita berdua belum bertemu
Hanyu Lawit muneng hang Ulu Kahayan/ kau jauh tinggal di Hulu sungai Kahayan
Malaing Malahau Nanamni Mate andrau/ Panas Gerah rasanya sang surya
Jalah rahatan ngupuh kawan anak andrau/ bagai saat membakar serangga
Arai ateiku ku daya hanyu nerau/ Bahagia hatiku karena kau memanggil
Numpan ngapung hanyu hang higa Jarau/ Tuk menemuimu dekat pohon besar
Aku Nempat nunung ngenei atei kasungu/Ku berlari menemui membawa hati yang merindu
Ngenei Sinta andri Lelu teka waluh Watu/membawa cinta kasih dari tanah berbatu
Uma jukung sa weheini tepu/ naik perahu pengayuhnya patah
Hamen Panalu puang ule hudu/ ingin bertemu tak tertahankan
Hampe tumpuknu ku kai puang kaule mamai/ Sampai kampungmu hampai ku tak sanggup naik
Manalu hanyu hang putut Ramai/ Menemui mu di bawah pohon Rambai
Tu’u marauh enguh tenganu jalah wunge sarai/ Harum badanmu bagaikan bunga serai
Hampe hewukku kai pada wawai/ sampai nafasku hampir menghilang
Panriet batatai tarueh Maharung/ Rapat Kita duduk berdampingan
antuh ulun sampuk paurung/ orang bilang bagaikan susunan kayu bakar
nelang nyanrengei kawan lengan wurung/ sambil dibuai kicauan burung
Dayanu aku wawai hang wuang urung/ kau membuatku hilang di balik hidung
Awat Naun Pamakal Pangulu/ mohon bantuan Pembakal Penghulu
Wansit na adu kami Badahulu/ cepat nikahkan kami dengan segera
biar ekat nuen uwut sakulu/ walau hanya hidangan rotan pahit
sika pangantin upuni raja manuwu/ tapi pengantin prianya teramat Tampan
Naan lagi haba nuan, awat wara ma aku hang iti
Tidak ada komentar:
Posting Komentar